Judg 3 | GerLut1545lh | e4.org | D JS ſind die Heiden / die der HERR lies bleiben / Das er an jnen Jſrael verſuchete / die nicht wuſten vmb die kriege Canaan /

‏ Judges 3

1 DJS ſind die Heiden / die der HERR lies bleiben / Das er an jnen Jſrael verſuchete / die nicht wuſten vmb die kriege Canaan / 2 vnd das die Geſchlechter der kinder Jſrael wüſten vnd lerneten ſtreiten / die vorhin nichts drumb wuſten / 3 nemlich die fünff Fürſten der Philiſter / vnd alle Cananiter vnd Zidonier / vnd Heuiter die am berge Libanon woneten / von dem berg BaalHermon an / bis man kompt gen Hemath. 4 Dieſelben blieben / Jſrael an den ſelben zuuerſuchen / Das es kund würde / ob ſie den Geboten des HERRN gehorchten / die er jren Vetern geboten hatte / durch Moſen. ^a 5 DA nu die kinder Jſrael alſo woneten vnter den Cananitern / Hethitern / Amoritern / Phereſitern / Heuitern vnd Jebuſitern / 6 namen ſie jener Töchter zu Weibern / vnd gaben jre Töchter jener Söne / vnd dieneten jener Göttern / 7 Vnd theten vbel fur dem HERRN / vnd vergaſſen des HERRN jres Gottes / vnd dieneten Baalim vnd den Haynen. 8 Da ergrimmet der zorn des HERRN vber Jſrael / vnd verkaufft ſie vnter die hand CuſanRiſathaim / dem könige zu Meſopotamia / Vnd dieneten alſo die kinder Jſrael dem CuſanRiſathaim acht jar. ^b 9 DA ſchrien die kinder Jſrael zu dem HERRN / Vnd der HERR erwecket jnen einen Heiland / der ſie erlöſet / Athniel / den ſon Kenas / Calebs jüngſten bruders. 10 Vnd der Geiſt des HERRN war in jm / vnd ward Richter in Jſrael / vnd zoch aus zum ſtreit / Vnd der HERR gab den könig zu Syrien CuſanRiſathaim in ſeine hand / das ſeine hand vber jn zu ſtarck ward. 11 Da ward das Land ſtil / vierzig jar / Vnd Athniel der ſon Kenas ſtarb. 12 ABer die kinder Jſrael theten furter vbels fur dem HERRN / Da ſterckt der HERR Eglon den könig der Moabiter wider Jſrael / Darumb das ſie vbels thaten fur dem HERRN. 13 Vnd ſamlet zu jm die kinder Ammon / vnd die Amalekiter / vnd er zoch hin vnd ſchlug Jſrael / vnd nam ein die Palmenſtad. 14 Vnd die kinder Jſrael dieneten Eglon der Moabiter könig achzehen jar. 15 DA ſchrien ſie zu dem HERRN / Vnd der HERR erwecket jnen einen Heiland / Ehud den ſon Gera / des ſons Jemini / der war Linck. Vnd da die kinder Jſrael durch denſelben Geſchenck ſandten / Eglon der Moabiter könige / 16 macht jm Ehud ein zweiſchneidig Schwert / einer ellen lang / vnd gürtet es vnter ſein Kleid auff ſeine rechten hüfft / 17 vnd bracht das Geſchenck dem Eglon der Moabiter könige / Eglon aber war ein ſeer fetter Man. 18 VND da er das Geſchenck hatte vberantwortet / lies er das Volck / die das Geſchenck getragen hatten. 19 Vnd kart vmb von den Götzen zu Gilgal / vnd lies anſagen / Jch hab o König dir was heimlichs zu ſagen. Er aber hies ſchweigen / vnd giengen aus von jm alle die vmb jn ſtunden. 20 Vnd Ehud kam zu jm hinein / Er aber ſas in der Sommerleube. Vnd Ehud ſprach / Jch hab Gottes wort an dich / Da ſtund er auff von ſeinem ſtuel. 21 Ehud aber recket ſeine lincken hand aus / vnd nam das Schwert von ſeiner rechten hüfft / vnd ſtieſſ jm in ſeinen Bauch / 22 das auch das hefft der ſchneiten nach hinein fur / vnd das fette das hefft verſchlos (Denn er zoch das ſchwert nicht aus ſeinem bauch) das der miſt von jm gieng. 23 Aber Ehud gieng den Saal ^{▼▼Die Ratſtube / vbi ordinati et erant ſedes etc.} hinaus / vnd thet die thür hinder jm zu vnd verſchlos ſie. 24 DA er nu hinaus war / kamen ſeine Knechte hinein / vnd ſahen das die thür der Sommerleube verſchloſſen war / vnd ſprachen / Er iſt vieleicht zu ſtuel gangen in der kamer an der Sommerleube. 25 Da ſie aber ſo lange harreten / bis ſie ſich ſchemeten / Denn niemand thet die thür der Leuben auff / namen ſie den ſchlüſſel vnd ſchloſſen auff / Sihe / da lag jr Herr auff der erden tod. 26 EHud aber war entrunnen die weil ſie verzogen / vnd gieng fur den Götzen vber / vnd entran bis gen Seirath. 27 Vnd da er hinein kam / blies er die Poſaunen auff dem gebirge Ephraim. Vnd die kinder Jſrael zogen mit jm vom Gebirge / vnd er fur jnen her. 28 Vnd ſprach zu jnen / Jaget mir nach / Denn der HERR hat euch die Moabiter ewr Feinde in ewr hende gegeben. Vnd ſie jagten jm nach / vnd gewunnen die Furt am Jordan ein / die gen Moab gehet / vnd lieſſen niemand hin vber gehen / 29 vnd ſchlugen die Moabiter zu der zeit / bey zehen tauſent Man / allzumal die beſten vnd ſtreitbare Menner / das nicht einer entran. 30 Alſo wurden die Moabiter zu der zeit vnter die hand der kinder Jſrael gedempfft / Vnd das Land war ſtille achzig jar. 31 DARnach war Samgar der ſon Anath / Der ſchlug ſechs hundert Philiſter / mit einem Ochſenſtecken / vnd erlöſet auch Jſrael.