1Cor 1 | GerLut1545lh | e4.org | P Aulus beruffen zum Apoſtel Jheſu Chriſti / Durch den willen Gottes / vnd bruder Soſthenes.

‏ 1 Corinthians 1

1 PAulus beruffen zum Apoſtel Jheſu Chriſti / Durch den willen Gottes / vnd bruder Soſthenes. 2 DEr gemeine Gottes zu Corinthen / den geheiligten in Chriſto Jheſu / den beruffenen Heiligen / Sampt allen denen / die anruffen den Namen vnſers HErrn Jheſu Chriſti / an allen jren vnd vnſern Orten. 3 GNade ſey mit euch vnd Friede / Von Gott vnſerm Vater / vnd dem HErrn Jheſu Chriſto. 4 JCh dancke meinem Gott alle zeit ewer halben / fur die gnade Gottes / die euch gegeben iſt in Chriſto Jheſu / 5 Das jr ſeid durch jn an allen ſtücken reich gemacht / an aller Lere / vnd in aller Erkentnis. 6 Wie denn die predigt von Chriſto in euch krefftig worden iſt / 7 Alſo / das jr keinen mangel habt an jrgent einer Gaben / Vnd wartet nur auff die offenbarung vnſers HErrn Jheſu Chriſti / 8 welcher auch wird euch feſt behalten bis ans ende / Das jr vnſtrefflich ſeid auff den tag vnſers HErrn Jheſu Chriſti. 9 Denn Gott iſt trew / durch welchen jr beruffen ſeid zur gemeinſchafft ^{▼▼Das iſt / Jr ſeid Miterben vnd Mitgenoſſen aller güter Chriſti.} ſeines Sons Jheſu Chriſti vnſers HErrn. 10 Jch ermane euch aber / lieben brüder / durch den Namen vnſers HErrn Jheſu Chriſti / das jr allzumal einerley Rede füret / vnd laſſet nicht Spaltung vnter euch ſein / Sondern haltet feſt an einander ^{▼▼Das jr euch nicht laſſet trennen.} in einem ſinne / vnd in einerley meinung. 11 Denn mir iſt furkomen / lieben Brüder / durch die aus Cloes geſinde / von euch / Das Zanck vnter euch ſey. 12 Jch ſage aber dauon / Das vnter euch einer ſpricht / Jch bin Pauliſch / Der ander / Jch bin Apolliſch / Der dritte / Jch bin Kephiſch / Der vierde / Jch bin Chriſtiſch. 13 Wie? Jſt Chriſtus nu zertrennet? Jſt denn Paulus fur euch gecreutziget? Oder ſeid jr in Paulus namen getaufft? 14 JCH dancke Gott / das ich niemand vnter euch getaufft habe / on Chriſpum vnd Gaium / 15 Das nicht jemand ſagen möge / Jch hette auff meinen namen getaufft. 16 Jch habe aber auch getaufft des Stephana hausgeſinde / Darnach weis ich nicht / ob ich etliche ander getaufft habe. 17 Denn Chriſtus hat mich nicht geſand zu teuffen / ſondern das Euangelium zu predigen / Nicht mit klugen worten / Auff das nicht das Creutz Chriſti zunicht werde. 18 Denn das wort vom Creutz iſt eine torheit / denen / die verloren werden / Vns aber / die wir ſelig werden / iſts eine Gottes krafft. 19 Denn es ſtehet geſchrieben / Jch wil vmbbringen die weisheit der Weiſen / vnd den verſtand der Verſtendigen / wil ich verwerffen. 20 Wo ſind die Klugen? Wo ſind die Schrifftgelerten? Wo ſind die Welt weiſen? Hat nicht Gott die weisheit dieſer Welt zur torheit gemacht? ^c 21 DEnn die weil die Welt / durch jre weisheit / Gott in ſeiner weisheit nicht erkandte / Gefiel es Gott wol / durch törichte Predigte ſelig zu machen / die / ſo dar an gleuben. 22 Sintemal die Jüden Zeichen foddern / vnd die Griechen nach Weisheit fragen. 23 Wir aber predigen den gecreutzigten Chriſt / Den Jüden eine Ergernis / Vnd den Griechen eine Torheit / 24 Denen aber die beruffen ſind / beide Jüden vnd Griechen / predigen wir Chriſtum / göttliche Krafft vnd göttliche Weisheit. 25 Denn die göttliche Torheit ^{▼▼Göttliche torheit vnd ſchwacheit iſt das Euangelium / das fur den Klugen nerriſch / fur den Heiligen ketzeriſch / Aber fur den Chriſten mechtig vnd weiſe iſt.} iſt weiſer denn die Menſchen ſind / vnd die göttliche Schwacheit iſt ſtercker denn die Menſchen ſind. 26 SEhet an / lieben Brüder / ewren beruff / Nicht viel Weiſen nach dem fleiſch / nicht viel Gewaltige / nicht viel Edle ſind beruffen / 27 Sondern was Töricht fur der welt / das hat Gott erwelet / Das er die Weiſen zuſchanden machet. Vnd was Schwach iſt fur der welt / das hat Gott erwelet / Das er zuſchanden machet was Starck iſt / 28 Vnd das Vnedle fur der welt / vnd das verachte hat Gott erwelet / vnd das da nichts iſt / Das er zunicht machet / was etwas iſt / 29 Auff das ſich fur jm kein Fleiſch rhüme. 30 Von welchem auch jr her kompt in Chriſto Jheſu / Welcher vns gemacht iſt von Gott zur Weisheit / vnd zur Gerechtigkeit / vnd zur Heiligung / vnd zur Erlöſung. 31 Auff das (wie geſchrieben ſtehet) Wer ſich rhümet / der rhüme ſich des HERRN. ^e